dimanche 17 août 2003

Balade

Ie meurs de soif en couste la fontaine
Tremblant de froit ou feu des amoureux ;
Aveugle suis et si les autres maine ;
Pouvre de sens, entre saichans l'un d'eulx ;
Trop negligent, en vain souvent songneux.
C'est de mon fait une chose faiee,
En bien et mal par Fortune menee.

Ie gaigne temps et pers mainte sepmaine ;
Je joue et ris quant me sens douloreux ;
Desplaisance j'ay d'esperance plaine ;
J'atens bon eur en regret engoisseux ;
Rien ne me plaist et si suis desireux ;
Je m'esjoïs et cource a ma pensee,
En bien et mal par Fortune menee.

Ie parle trop et me tais a grant paine ;
Je m'esbaïs et si suis couraigeux ;
Tristesse tient mon confort en demaine :
Faillir ne puis au mains a l'un des deulx.
Bonne chiere je faiz quant je me deulx ;
Maladie m'est en santé donnee,
En bien et mal par Fortune menee.


L'envoy

Prince, je dis que mon fait maleureux
Et mon prouffit aussi avantageux
Sur ung hasart j'asserray quelque annee,
En bien et mal par Fortune menee.

Charles d'Orléans. Ballade 75.



Aucun commentaire:

Enregistrer un commentaire

Dans la vie on prend toujours le mauvais chemin au bon moment. Dany Laferrière.